Avropa Parlamentinin 30-dan çox deputatı Gürcüstanda baş verən hadisələrlə bağlı Avropa İttifaqının (Aİ) xarici əlaqələr və təhlükəsizlik siyasəti üzrə ali nümayəndəsi Cozep Borrellə açıq məktub ünvanlayıb.

“birdenem.az” xəbər verir ki, bu barədə məlumatı Avropa Parlamentinin üzvü Petras Austrevicius öz “X” hesabında paylaşıb.

Avropalı parlamentarilər məktubda ölkədə “Xarici təsirin şəffaflığı haqqında” qanunun qəbul edilməsinə cəhdləri və dinc nümayişçilərə qarşı güc tətbiq edilməsini tənqid ediblər. Onlar Borreli konkret addımlar atmağa çağırıb və Gürcüstanın Aİ-yə üzvlüyə namizəd statusunun dayandırılmasını, eləcə də ölkənin maliyyələşdirilməsinin nəzərdən keçirilməsini tələb ediblər. 

Xatırladaq ki, Gürcüstan parlamenti aprelin 17-də “Xarici təsirin şəffaflığı haqqında” qanun layihəsini birinci oxunuşda, mayın 1-də isə ikinci oxunuşda qəbul edib. Sözügedən qanun xaricdən maliyyələşən qeyri-hökumət təşkilatlarının və KİV-lərin xüsusi reyestrdə qeydiyyata alınmasını və illik bəyannamələrin doldurulmasını nəzərdə tutur. Qanun layihəsinin parlamentdə müzakirəyə çıxarılması ölkədə kütləvi etiraz aksiyalarına və etirazçılarla polis arasında qarşıdurmalara səbəb olub. Gürcüstan Prezidenti Salome Zurabişvili isə ölkədə etirazlara səbəb olan bu qanuna veto qoyacağını açıqlayıb. Qanun layihəsi üçüncü oxunuşda qəbul edilməlidir.